Cefnogi Rhentwyr Preifat: rhannu llais y tenant ar achosion o droi allan heb unrhyw fai?

Helo bawb, Eleanor ydw i ac yn ddiweddar rwyf wedi cymryd yr awenau fel Arweinydd Polisi yn TPAS Cymru.

Ddoe, bûm mewn gweithdy gyda Llywodraeth Cymru i drafod eu hymateb i adroddiad gan y Pwyllgor Llywodraeth Leol a Thai. Mae'r adroddiad hwn yn canolbwyntio ar y Sector Rhentu Preifat (SRhP) ac yn amlinellu 13 o argymhellion ar gyfer gwelliannau polisi.

Un ffocws allweddol i'r gweithdy oedd Argymhelliad 6, sy’n cynnig y dylid caniatáu i denantiaid sy’n wynebu cael eu troi allan heb fai gadw’r ddau fis olaf o rent eu tenantiaeth fel iawndal am effaith ariannol a lles symudiad gorfodol.

Fe wnaethom ymuno â swyddogion Llywodraeth Cymru a sefydliadau eraill o bob rhan o’r sector tai yn y gweithdy i rannu safbwyntiau. Gwnaeth TPAS Cymru yn siŵr ei fod yn dod â lleisiau tenantiaid ymlaen, gan dynnu ar ein Pwls Tenantiaid a gwaith gwrando ehangach.

Y sgwrs: Safbwyntiau Landlord yn erbyn Tenant

Roedd sefydliadau landlordiaid yn dadlau nad oes angen yr argymhelliad hwn. Roeddent yn rhannu bod landlordiaid eisoes yn wynebu costau uwch, megis bodloni gofynion EPC newydd ar gyfer effeithlonrwydd ynni. Maent hefyd yn teimlo y dylid canolbwyntio ar gymell landlordiaid da, yn hytrach na gweithredu polisïau a allai atal buddsoddiad yn y SRhP.

Ar y llaw arall, amlygodd sefydliadau sy’n canolbwyntio ar denantiaid, gan gynnwys TPAS Cymru, fod symud yn ddrud. Byddai’r argymhelliad hwn yn lleddfu’r baich ariannol ar denantiaid sy’n cael eu gorfodi i symud. Os caiff ei weithredu, gallai hefyd fod yn gam pwysig i atal digartrefedd a chefnogi tenantiaid wrth chwilio am eiddo. Mae llawer o denantiaid yn dweud wrthym eu bod yn y pen draw yn talu ‘rhent dwbl’ ym mis olaf eu tenantiaeth, a byddai’r argymhelliad hwn yn atal hynny rhag digwydd.t.

Beth mae TPAS Cymru yn ei feddwl?

O’n hymchwil Pwls Tenantiaid diweddaraf, rydym yn gwybod bod dwywaith cymaint o denantiaid yn 2024, o gymharu â 2023, eisiau aros yn eu cartrefi am y tymor hir. Nid yw llawer o denantiaid yn disgwyl nac yn cynllunio ar gyfer symud, ac yn dweud nad oes ganddynt fawr ddim arbedion, felly gallai’r argymhelliad hwn gynnig cymorth ariannol hanfodol.

Fodd bynnag, mae gennym rai pryderon. Sut byddai’r argymhelliad hwn yn effeithio ar rentwyr preifat sy’n talu rhent drwy fudd-daliadau? Byddwn yn gofyn am ragor o eglurhad ar hyn.

Beth fyddai'r effaith ar fyfyrwyr sy'n rhentu? Mae hwn yn faes allweddol arall yr ydym yn bwriadu ei godi gyda Llywodraeth Cymru. Mae gan lawer o denantiaid SRhP gynilion isel, a chredwn y gallai’r mesur hwn ddarparu rhyddhad ariannol hanfodol ar adeg anodd.

Beth ydych chi'n ei feddwl?

Fel bob amser, mae TPAS Cymru yma i gynrychioli eich barn. Beth yw eich barn am y cynnig hwn? A fyddai’n gwneud gwahaniaeth i rentwyr yng Nghymru?

Ymunwch â ni ar y sgwrs hon a rhannu eich barn. Os hoffech siarad â ni am hyn, e-bostiwch [email protected]. A pheidiwch ag anghofio cadw llygad ar ein sianeli cyfryngau cymdeithasol am ragor o ddiweddariadau polisi.

Diolch.